¡Benvenescu àl verziun 1.1.0 del noveu Översteir!
Atendetz, ¿e-ça qe hi estev'iensă verziun 1.0?
Üc, c'esteva l'iensă qi lenc'heva sür li. 10. Avrïu. Voi pevetz adüc aflar-en sür https://oversteir.talossa.com/legacy in cauçă q'ingenc'hosă falescha.
¿Qet cambieva?
Muităs cosăs, starp altrăs:
- Ünă nouă funziun complätsmint funziunal qi xhenera las formăs plurais es femneis dals nóminăs es dels axhectivis;
- El glheþ da surçă es el glheþ dal interfiçă d'uçeir nun sint sondreux: ja'iens noveu knöpfeu per cambiar el glheþ dal interfiçă d'uçeir, es si nun put úçar l'Översteir complätsmint in el Talossan schi si chera (zemimhoct: signhac'hartetz https://oversteir.talossa.com/?ui=tzl per l'eintradă velotsch);
- Si nun put cambiar el glheþ da surçă sanc fraschciantar la páxhină - la páxhină resta fraschciantind quand qe si cambia el glheþ dal interfiçă d'uçeir, mas si non pierdarha qet si çerçeva ingen mhor;
- Dels fixamaintschen per dals traduziuns diviarsen es altrăs ißüns glheþeascăs;
- Dels fixamaintschen da falours diviarsen, dals refactoriçaziun del codeu es dals miglhoriçaziuns visuais per qet éu sint tro lengind per postitxar eda qet téu obliat - avistetz las ziferençuns es gagnhetz-voi 'n vaischlă.
¿Perqet isch-ça 1.1.0 es non 1.1?
Parç qe téu püblicat ünă cartă dals rutăs per dals nouăs featürăs per la verziun 1.1, es veleveu relaschar la nouă verziun adinc finischeveu la maxhorità da ça. Mas aglhorc la featüră da declinaziun füt preparadă es téu fixat ocså muităs altrăs cosăs, es non veleveu sestar sür toct acest per qi säp come lung.
¿Qet sova?
In úrderi dal precedençă/probavalità:
- Escaçins da 1.1.1: La çerçă strecuradă par el pärts da discuors (ünă featüră del vell Översteir), la partetxă dals resultaes...
- Cosalïă per SIGN: Dels utuis da phü per aceßar els pärtsilor fundamaintschais del Översteir, svo à dals cosăs povent estar fixadăs pü rapidămint es sanc tocar el codeu (Muităs cosăs codadăs in düreu, fossent estar schmoveschti àls tableux in la colectă dels datüns com'iensă facendă dal propră zesegnhă zespitzi toct.)
- Cosalïă qi aintparstadra ună relaschă magnh (¿1.2?): La sülavaliçaziun, la zesteziun del metramaintsch dal emfasiçù, l'AFI/pronunçaziun Anglesc. Eßentzialmint, preindetz voasta azul es cunvertetz-en à'iens ah-ZOO, autumätsmint, per toct i mocts.
- Cosalïă façaval qi resquira del traval magnh: El sünþesis vocal. Noi tiennent voastra ah-ZOO, qe noi nun naudadrent ünă cudescherïă per lirar-en hardop. (Es put-estar en laßadrent lirar dels texts entieirs hardop quand qe noi sint detxa aicì.)
- Cosalïă da prună: La traduziun àls glheþen mutipais, la traduziun dals fraçăs complätsilor, bla bla bla. Ça non paßarha, es schi ça paßa, povadréu ocså façar-en profeziunalmint.
¡Afleveu ün falour! ¡Téu ünă proposiziun! ¡Améu voastra traval!
Cumpeténs, ¡ditz-en àð üns! Ja'iens linc direct sub la buiçă del Översteir per suotamestar acestilor cosăs, es voi pevetz contactar eda Lüc da Schir eda Marcel Tafial sür Wittenberg eda Discord.